التصنيف: اطباق رئيسية

المقادير:

1/2 كيلو ملوخية خضرا منظفة جيدا ومقطفة ومفرومة ( بالمخرطة )
2كوب شوربة
4 فصوص ثوم مفرومة ناعم جدا
ملعقة صغيرة كزبرة ناشفة
معلقتين كبيرة زبدة مع معلقة زيت
مكعب ماجى

الطريقة :

تحضري الملوخية وتقطفي الورق وتغسليه عدة مرات للتخلص من التراب جيدا
توزعي اوراق الملوخية النظيفة على ورق جرايد أو ورق يمتص البلل .. واتركيها حتى تتخلصي من الماء الزائد عليها
ضعيها في صينية كبيرة تكفي الكمية وابدئي في تخريطها ( تقطيعها بالمخرطة )
تأكدي من أنها اصبحت ناعمة شوية
اغلي الشوربة ( المرق ) وذوبي فيه مكعب ماجى
اهرسي الثوم وضعي عليه الكزبرة وضعي جزء ضئيل جدا من الخلطة على الشوربة ضيفي الملوخية الى الشوربة وقلبيها
يعنى اول ماتبتدى تغلى نشيلها من على النار على طول ولانغطيها لان ذلك سيؤدي الى انفصالها عن الشوربة
طريقة عمل التقلية:
ضعي ملعقة الزبدة والزيت في طاسة صغيرة وضعي باقي خلطة الثوم عليها
عندما يتحمر الثوم ويصبح لونه ذهبي تضيفيه على الملوخية

المقادير:

3 معلقة زبدة+معلقتين زيت

بصلة مبشورة أو مقطعة صغير

نصف كيلو لحم فيليه

ربع كيلو مشروم مقطع شرايح

كوب كريمة

معلقة مسطردة

معلقة صويا صوص

ملح – فلفل اسود

الطريقة:

نضع معلقتين زبدة ومعلقة زيت فى الطاسة يسخن كويس ثم نضيف اللحمة تتحمر من الجانبين  ثم ننشله على جنب

 

 

وفى نفس الطاسة نضع باقى الزبدة والزيت ونضع البصلة ونقلب حتى تحمر ثم نضيف المشروم ونقلب دقايق ثم نضيف اللحمة تانى والمسطردة والصويا

ونقلب دقايق

ثم نضيف كوب ماء ونتركها تغلى ثم نهدى النار حتى تنضج اللحمة لو احتاجت ماء ممكن نضيف ليها قليل من الماء حتى تنضج

ثم تضاف الكريمة  والملح والفلفل

ونتركها تغلى حتى تتقل شوية

ثم تقدم مع الارز او المكرونة

المقادير:

نصف كيلو لحمة مقطعة مكعبات
بصلة مبشورة
ملح و فلفل
بهارات  -معلقة صغيرة زعتر ناشف
3 حبات بطاطس مقطعة مكعبات و مقلية

الطريقة:

في حلة تشوح اللحمة و البصل في قليل من الزيت الى ان تتحمر جيدا تضاف البهارات و تحرك لدقايق

 

ثم يضاف كوب ماء و تغطى و تطهى على نار هادية حتى تستوي اللحمة(لو احتاجت مية نزود ميه قليلة لحد ماتستوى )
ثم تضاف البطاطس المقلية

و تصب في طاجن الفرن تدخل الفرن ربع ساعة ثم تقدم

ملاحظة:

ممكن تقطيع البصل شرايح كما تحبى وتشويحه مع اللحمة وممكن تزودى البصل

المقادير:
كيس لسان عصفور
2 كوب شوربة دجاج
ملعقة صلصلة صغيرة
حبة طماطم مقطعة مكعبات
كوب فلفل الوان مقطع مكعبات
2 ملعقة كبيرة زيت

الطريقة:
فى اناء على النار يحمر لسان العصفور جيداً حتى يصبح لونه ذهبى

تضاف الشوربة  وتتبل بالملح

يترك الخليط على نار هادئة حتى يقترب إلى درجة النضج

ثم يضاف الفلفل الالوان والطماطم ومعلقة الصلصة ويغطى ويترك حتى ينضج تماما

تقدم مع اللحمة او بط محمر

 

أكلة تصنع من أمعاء الخراف أو البقر المحشوة بالأرزفى مصر تسمى ممبار وفي تونس والجزائر وليبيا تسمى عصبان

المقادير:
كيلو ممبار
كيلو ونصف ارز
كوب بقدونس
كوب كزبرة
نصف كوب شبت
كيلو طماطم+معلقتين صلصة
ملح فلفل اسود بهارات
بصلتين كبار

نصف كوب زيت

الطريقة:
نغسل الممبار ويوضع تحت الحنفيه ننضفه من بره وبعدين نقلبه ونشيل بالسكينه الطبقه الي جوه وبعدين نغسله كويس بالملح الخشن والدقيق وننقعه شويه بالخل والليمون ونقلبه تانى تحت الحنفيه الدهون تبقى من الخارج ونتركه منقوع لمدة نصف ساعه
نعمل الحشوة:
نبشر البصل ونقطع الطماطم قطع صغيرة جدا ونخلطها مع الصلصة ونفرم الخضرة ونغسل الرز ثم يخلط كله مع بعضه مع الملح والفلفل والبهارات والزيت
ويحشى الممبار يراعي ان لا يكون ممتلىء لان الارز يتمدد و يزيد حجمه و الممبار ينكمش قليلا عند وضعه في الماء

بعد ما نخلص نغرزه بالشوكه علشان مايتفكش في السلق
نغلي ماء ونضع بها ورق لوري وحبهان وبصلة وملح ولما تغلي نسقط فيها الممبار بحرص نمسكه من الطرفين و ننزله بالراحة  ثم نهدى النار عليه تقريبا بياخد 45دقيقة لساعة وبعدين ينشل على مصفى وينزل مائه تماما ونقطعه زى ما نحب ونحمره في الزيت مع معلقة سمنة ويكون غزير عشان ياخد كله نفس اللون او ممكن تحمريه تحت الشواية اللي يعجبك

ملاحظة :ممكن تسبكى الصلصة على النار الاول وبعدين تضيفى الارز والخضرة
وممكن تضيفى على الحشو لحمة مفرومة