طريقة عمل الفراخ المحشية

المقادير:
فرخة كيلو جرام
2كوب أرز
توابل
كبد وقوانص
زبيب
ملح
فلفل اسود
معلقة كارى(اختيارى)
2بصلة كبيرة
2معلقة زيت
1طماطم

الطريقة:
نظفى الفراخ كويس بالملح والدقيق والخل
وابشرى بصلة وطماطماية وحطى عليها توابل وملح وفلفل ومعلقتين زيت
وتبلى بيها الفرخة وغطيها وضعيها فى الثلاجة ساعتين

اعملى الحشوة
قطعى القوانص وشوحيها مع معلقتين زيت ثم الكبدة وبصلة مبشورة
وقلبى شوية وبعدين زودى ميه عشان القوانص تستوى شوية
ثم بعد ما البصل يدبل ضيفى البهارات والكارى وملح وفلفل وضيفى الارز المغسول
وقلبى شوية وبعدين ضيفى كوب ماء واتركيه يشرب الميه ويستوى نص سوى
وبعدين ضيفى عليه ربع كوب زبيب مغسول
ثم طلعى الفرخة واحشيها بالرز من جوه وعند الوراك ومن عند الرقبة واقفليها بالخلة أو الابرة
ثم اسلقيها فى ميه مغلية مع ملح وفلفل وورق لورا وحبهان وبصلة
تترك على نار هادئة لمدة ساعة حتى تستوى وتصفى من الشوربة
وبعدين تدهن بالصلصة والزيت أو الزبدة وبهريها بالملح والفلفل ودخليها الفرن تتحمر
وباقى الرز زودى عليه كوب ميه واتركيه على نار هادية يستوى ويقدم مع الفراخ

وممكن بدل ماتسلقيها تجيبى صينية وتحطى فيها خضار مقطع جزر بطاطس مع بصل وطماطم
وترشى عليهم ملح وفلفل وكوباية ميه وتحطى الفراخ عليهم وتغطيها بالفويل ودخليها الفرن تستوى ساعة وربع
وبعدين افتحى الشواية عليها