كنت عايزة اعمل حاجة مينى ومكنتش صورتها قبل كده فكرت فى البرجر وبعدين قعدت افكر اعملها ازاى
اوقات بعملها كور صغيرة وخلاص وتخمر وتبقى زى الكيزر بس اوقات بتبقى مليانة عجين من جوه بس جاتلى الفكرة ديه وقلت اجرب وطلعت هاااااااايلة وسهلة وتنفع لأى مناسبة عيد ميلاد او حفلة او عزومة زى ما تحبى
والبرجر هنا انا عملته بيتى ممكن انتى تجيبى الجاهز وتقطعيه قبل ماتسويه بالقطاعة او حتى بعد السوى هايبقى متناسق واحلى
وجربى وامانة عليكى تدعيلى
المقادير:
4كوب دقيق
ربع كوب زيت
معلقة كبيرة خميرة فورية
معلقة كبيرة بيكنج بودر ومعلقة كبيرة سكر
معلقة صغيرة ملح
4ملاعق لبن بودر
ماء دافئ للعجن
مقادير البرجر
نصف كيلو لحمة مفرومة
بصلة مبشورة
معلقة صغيرة ملح ورشة فلفل اسود وبهارات
بيضة
4ملاعق بقسماط
باقى المقادير
جبنة شيدر
لانشون
خس
مايونيز
الطريقة :
نضع الخميرة مع معلقة كبيرة سكر مع ربع كوب ماء دافئ ونتركها 10 دقايق حتى تتفاعل وتعلى(بالخطوة ديه بتأكد ان الخميرة شغالة من الاول )
وبعدين بضيفها على الدقيق والملح والبيكنج بودر والزيت ونعجنها بإضافة الماء الدافئ حتى نعصل على عجينة لينة طرية نتركها فى وعاء مدهون زيت وندهن وشها بالزيت ونغطيها بفوطة وتترك حتى تخمر يتضاعف حجمها
نعمل البرجر:نخلط جميع المكونات ثم نعمله كور صغيرة ثم فى طاسة مع معلقتين زيت نضع كور البرجر تتحمر وبعدين حطيتها فى صينية وعلى الفرن 10دقايق تكمل سواها
نقطع الجبنة الشيدر واللانشون بنفس القطاعة اللى قطعنها بيها العجينة
طريقة تشكيل العجينة وهو ده المهم
هنفرد العجينة بس تبقى تخينة شوية مش رفيعة بالسمك اللى فى الصورة ده
وبعدين نجيب اى حاجة مدورة قطعى بيها انا عشان كنت عايزه اعمله صغير اوى عملت بالكورنيه اللى عندى
بس ورصيتها فى صينية مدهونة زيت او مرشوشة دقيق زى ما بعمل وتدهن بالبيض وترش بالسمسم وتدخل الفرن يكون ساااااااااااااخن على درجة 200 يعنى اعلى من المتوسط تقريبا مش بتكمل 15 دقيقة
نطلعها تبرد نقسمها بالسكينة على اتنين ندهن الجزء السفلى بالمايونيز ثم نضع ورقة خس صغيرة ثم الجبنة او اللانشون زى ماتحبى ده اختيارى وبعدين الكفتة او البرجر اللى عملنها كور ونضع عليه الجزء العلوى وتثبت بالخلة بس وتقدم
