كيك بوبس

ممكن تعمليها من بواقى الكيك وتخلطى معاها اللى يعجبك وتكوريها واهم حاجة تحطيها فى الثلاجة عشان تجمد شوية عشان لما تحطيها فى الشيكولاتة تجمد على طول
كنت عملتها فى عيد ميلاد ولادى بصراحة شكلها شيك وممكن تحطى فيها اعواد خشب وبعدين تحطيهم فى كاس او فازة طويلة

المقادير:
للكيك:
كوب ونصف دقيق
نصف كوب زيت
نصف كوب لبن حليب
كوب سكر
معلقة كبيرة بيكنج بودر
فانيليا
2بيضةا

الكريمة: يا اما جبنة كريمى او اى كريمة تعجبك (كريمة الزبدة او كريم شانتيه) او نوتيلا او دانتيت

لتغطية الكيك بوبس:شيكولاتة بيضاء خام – شيكولاتة فارمسيل أو مكسرات مفرومة للتزيين

الطريقة:
اخلطى البيض مع السكر دقايق ثم ضيفى الزيت والفانيليا واللبن ثم الدقيق مع البيكنج بودر وضعى الخليط فى صينية مدهونة ومبطنة بالدقيق ثم تدخل فرن ساخن تقريبا 30:40 دقيقة
اختبرى السوا بتاع الكيك بادخال عود خشبى لو خرج نظيف يبقى استوى

فتتى الكيك بعد مايبرد ثم اخلطى معاه الجبنة الكريمى وقلبى حتى تختلط الجبنة بالكيك اعجنى على خفيف حتى تبقى عجينة متماسكة ثم نعمل منها كور وندخلها الثلاجة ساعة

ندوب الشيكولاتة على حمام مائى حتى تدوب ثم نغمس الكيك فى الشيكولاتة بالشوكة وهزيها عشان تتخلصى من الشيكولاتة الزيادة وتوضع على ورق زبدة ثم ترش بالشيكولاتة الفارمسيل