أختكم مش بتحب كبدة الفراخ بس كان فى ناس جايين وكنت عايزة ازود أصناف لاقيت فى الثلاجة كبدة فقلت اجرب واعملها وربنا يستر بصراحة طلعت حلوة وكل الموجودين حبوها اهم حاجة تغسليها كويس وتنقعيها زى ما هانقول فى الطريقة ان شاء الله واحتمااال برده بعد ماتعملى كده حماتك تقولى انها زفرة انتى ونصيبك بقى 😀
المقادير:
كيلو كبدة دجاج
كوب دقيق
معلقة صغيرة كارى
معلقة صغيرة بابريكا
معلقة كبيرة ملح
3ملاعق كبيرة مايونيز
3ملاعق كبيرة قشطة
3شرائح جبنة شيدر
3 ملاعق جبنة موتزريلاا
خليط النقع:كوب لبن معلقتين كبيرة خل معلقتين عصير ليمون معلقتين دقيق
الطريقة:
نغسل الكبدة كويس ونقلبهم بشوية دقيق ثم نغسلها ونحضر خليط النقع وتوضع الكبدة فيها وتترك ساعتين فيها
ثم فى طبق نخلط كوب الدقيق مع الكارى والبابريكا والملح…ثم نصفى الكبدة وتوضع فى الدقيق وتغطى من جميع النواحى
ثم فى طاسة سخنة نضع ربع كوب زيت يسخن ثم تحمر الكبدة من الجانبين وتنشل ثم توضع فى صينية وتدخل الفرن 10 دقايق ثم نخلط الجبن مع المايونيز والقشطة وتوضع على الكبدة وتقلب وتدخل تانى الفرن ربع ساعة وتحت الشواية دقيقة
وبألف هنا واللى يجربها يدعيلى
