الشاتوه ده اول كيك قابلنى على النت زماااان… بصراحة دورت على اصله كتير ما لاقيتش شكله اختراع مصرى هو سهل جدا واسهل حاجة فيه ان مقاديره ممكن تحفظيها كوباية من كله وانه فى كله فى الخلاط
والاسهل بقى انها كيكة منها فيها يعنى بتزوقيها منها مش بتحتاجى تعملى حاجة غيره
هى المفروض بالكاكاو انا غيرت كتييييييير ممكن بدل ماتعمليها بالكاكاو تحطى بداله كيس جيلى مثلا فراولة وتحطيها بدل الكاكاو وممكن تزودى لون احمر يدعمها اكتر
ممكن طبعا اى نوع جيلى انا بقولك على اللى استخدمته
ممكن برده تبدلى الكاكاو باللبن البودرة وتبقى كيكة عادية مش بالكاكاو يعنى مخمخى زى ماتحبى
المقادير:
كوب زيت
كوب سكر
كوب لبن(او كوب لبن مع معلقتين لبن بودرة)
نصف كوب كاكاو خااااااام من عند العطار مش نسكويك
كوب دقيق
2بيضة
معلقة صغيرة فانيليا
معلقة كبيرة بيكنج بودر
الطريقة بقى :
فى الخلاط حطى اللبن مع السكر والكاكاو وانزلى بالزيت سرسوب خفيف لحد ماتلاقى الصوص تقل ناخد من الخليط ده كوب ونشيله على جنب
وبعدين نضيف على باقى الخليط البيض والفانيليا
وبعدين فى بولة ننخل الدقيق مع البيكنج بودر ونضع الخليط عليه ونقلبه ثم يوضع فى صينية مقاس 22 مدهونة ومبطنة بالدقيق فرن يكون سخن تقريبا 180 بتاخد من 20 دقيقة لنصف ساعة
واول ماتخرج نضع عليها نصف كوب الصوص ونتركها تبرد ثم نضع الباقى ممكن تحطيها فى الثلاجة الصوص هايتقل عن كده شوية او قطعى كده وكلى ومتنسيش ليا حتة عندك:)